Seputarmadura.com, Songenep, Salasa 16 April 2019- Ujian nasional ngagem komputer kalompok ajar Paket C e Soengenep, Madhura, Jaba Temor, se enyerengi 1.226 oreng ampon tontas kalampan empa’ are, ngabidi are Jumat kantos Senen (12-15 April 2019).
“Ebuwan oreng se ngereng ujian nasional ka’dhinto, 100 persen ngagem komputer,” dhabuwepon Pelaksana Tugas (Plt) Kepala Dinas Pendidikan Soengenep, Mohammad Saidi, Salasa (16/4/2019).
Saidi abudhabu, ujian nasional ka’dhinto elampa’agi e 54 lembaga pendidikan e kacamatan dharat langkong e kacamatan polo.
“Kengeng eoladhi lalampan ujian kalompok ajar paket C ka’dhinto akadiya ujian formal se elampa’agi Sakola’an Menengah Atas (SMA) sa darajat,” dhabuwepon.
Saidi jugan adhabu, ujian nasional ngagem komputer ka’dhinto kalampan lancar, tak manggi alangan. Salerressa ampon eparanta se ta’ ngagem komputer.
Bupati Sumenep, A. Busyro Karim, jembar panggaliyan ngoladi addrengnga para peserta se ngereng ujian paket C.
Dhari bungaepon, Bapa’ Bupati adhabu, “Ka’dhinto menangka wujud pamerte magar sare dha’ makna tojjuwan pendidikan”.
Dhabuwepon Bupati, “Ujian nasional ngagem komputer kalompok ajar paket C ka’dhinto kalampan ngabidi Are Jum’at, 12 April 2019 kantos Senen, 15 April 2019 .
“Alhamdulillah Ujian Paket C kalastareyan lancar kantos pongkassepon,” dhabuwepon Bupati se ampon ngastane dhuwa’ periode ka’dhinto.
Bupati jugan adhabu, bab pendidikan ka’dhinto sanget ce’ parloepon dha’ pasera bisaos tor ja’ kantos adhabu tellat kaangguy ajar. Ponapa epon neng jaman se ampon maju kadiya samangken, pangataowan rassaepon sanget ekabuto kaangguy nekkane ponapa se daddi pangaterroepon otaba kapareng tekka hajad pan-ponapan se daddi kareb.
“Ijazah menangka bukte ja’ ampon tammat jugan sanget ekabuto, langkong-langkong kaangguy ngabdi, alamar lalakon e kantor, perusahaan, e ka’dhimma bisaos, masteepon ijazah menangka syarat otama-epon,” dhabuwepon Bupati. (Nit)
